【中場加料】又踏入首季業績公布期
2018年04月24日 12:41

　　雖然隔晚美股有啲腳軟，但港股喺A股急速反彈帶動下，半日曾升400點，高見30654，成功收復10天線( 30516)、20天線( 30371)及100天線( 30633)，但逼近阻力30700水平，亦即50天線( 30677)之前回頭，中午恒指報收30578，升324點，始終未企穩50天線及100天線。國指則升222點，報收12222。

　　今朝講過大市雖然利淡消息較多，但實際氣氛未致太差，當唔少專家都唱淡，古天后則認為係上落格局，暫時喺30700水平或有阻力，上半場升抵30700之前確見回頭，不過，一旦升破30700企穩，掉轉望望熊證街貨重貨區31000至31200又近一大步，再升至該水平屠熊機會即大增。講到底港股仍然係大型區間移動，呢個星期支持位暫上移至30100，首個阻力30700，下一個阻力係31000至31200，數嚟數去，仍處於大型移動區間29800至31800之內，只係呢個幾星期波幅有所收窄，暫時喺1000點內玩。

　　所以叫大家炒股唔炒市，上周曾提及當內房股跌得咁上下，可考慮撈一撈貨，皆因內房股銷售數字相對預期好，兼且唔多受中美貿易戰影響，或能發揮一定避險功能，結果今日內房股趁大市回升即反彈。至於內銀跟內險股，喺阿爺放水之下應該做好，奈何之前升勢曇花一現，今日兩個板塊均顯著上升，總算回復正常表現。

　　今朝日誌亦提到，呢個星期開始又有公司開始公布首季業績，唔排除缸邊友又部署炒業績，若然今次重磅股放榜完唔再見光死，有助改善整體投資氣氛。分拆平安好醫生(01833) 正招股嘅平保(02318) ，率先於周四(26日)公布首季業績，先睇平保能否借業績扭轉之前弱勢。

　　古天后

　　(徐狄怡，證監會持牌人)